Temperaturat e larta dhe neglizhenca e qytetarëve po vazhdojnë të përkeqësojnë situatën me zjarret në vend. Vetëm gjatë ditës së sotme janë raportuar gjithsej 41 vatra zjarri, ndërsa 14 prej tyre vazhdojnë të jenë ende aktive.
Sipas raportit zyrtar të Agjencisë për Menaxhimin e Emergjencave (AME), zjarret aktive janë të shpërndara në disa komuna të Kosovës, përfshirë:
Mitrovicë – Rashan,
Skenderaj – Llauzhë, Aqarevë, Tërnavc, Kopiliq,
Ferizaj – Burrnik, Nerodime,
Istog – Zallq, Gusar,
Podujevë – Batllavë, Belloshë, Hërticë, Rakinicë,
Pejë – Kryshevc,
Gjakovë – Zylfaj (aktiv), Shkukez (afër lokalizimit).
AME njofton se Njësitë e Zjarrfikjes dhe Shpëtimit janë të angazhuara në terren, me mbështetjen e Policisë së Kosovës, qytetarëve, vullnetarëve dhe strukturave komunale.
“Vërehet një ulje e intensitetit të rasteve të zjarrit krahasuar me ditën paraprake,” thuhet në njoftim.
Agjencia u bën thirrje qytetarëve të mos ndezin zjarre dhe të raportojnë menjëherë çdo rast apo person të dyshuar për zjarrvënie.
“Falënderojmë zjarrfikësit, strukturat e sigurisë dhe qytetarët për ndihmën dhe bashkëpunimin,” përfundon reagimi i AME-së
