Dega e PDK-së në Drenas ka reaguar me një komunikatë për media pas publikimit të incizimeve që përfshijnë kryetarin në ikje të Komunës së Drenasit, Ramiz Lladrovcin.
Në reagim thuhet se në incizim dëgjohen pazare që nuk bëhen për centa, por për miliona euro, duke u ndërtuar një strukturë e organizuar që ka ngritur sistem pazari mbi tokat komunale dhe pasurinë publike, të trajtuara si mall privat.
“Një nga elementet më shqetësuese është çështja e mbi-ndërtimit mbi pronë publike. Vetë kryetari në ikje jo vetëm që nuk e pengon, por e inkurajon mbi-ndërtimin e paligjshëm mbi 4 mijë metra katrorë pronë publike. Madje këtë shkelje flagrante të ligjit e arsyeton si rritje të vlerës për ‘interes publik’, kurse e vërteta është e kundërta: vlera po i rritet vetëm xhepave të tij dhe rrethit të ngushtë të profiterëve”, thuhet në komunikatë.
PDK thekson se prona publike nuk mund të trajtohet si valutë pazari, e as mbi-ndërtimi nuk mund të legalizohet me marrëveshje private. Sipas tyre, incizimet e publikuara dëshmojnë qartë se bëhet fjalë për përfitime të ngushta personale e jo për interes qytetar apo zhvillim urban.