Aeroplani që u rrëzua në Indi: Dyshime për veprim fatal nga pilotët

Byroja Hetuese e Aviacionit në Indi ka publikuar raportin preliminar për fluturimin tragjik të Air India-s, i cili u rrëzua në qershor, duke marrë jetën e 260 personave. Vetëm një pasagjer arriti të mbijetojë.

Fluturimi ishte nisur nga Ahmedabad drejt Londrës, por avioni mezi arriti të ngrihej nga pista dhe u përplas përsëri në tokë pak çaste më pas. Raporti i hetuesve ndriçon disa nga momentet dramatike në kabinën e pilotëve.

Sipas dokumentit, dy çelësat e kontrollit të karburantit – që përdoren për të ndalur motorët – ishin vendosur në pozicionin që ndërpret rrjedhën e karburantit, duke shkaktuar fikjen e motorëve. Ky pozicion zakonisht përdoret vetëm pas uljes apo në raste emergjente.

Pamjet dhe incizimet nga “black box”-i zbulojnë një bisedë të tensionuar midis pilotëve, ku njëri pyet tjetrin: “Pse e ke ndalur?”, dhe përgjigjja është: “Nuk e kam bërë unë”. Nuk është bërë e ditur se cilit pilot i përkiste secila nga fjalët, por në momentin e ngritjes, drejtimin e kishte bashkëpiloti, ndërsa kapiteni po monitoronte fluturimin.

Hetimet po vazhdojnë për të zbuluar nëse bëhet fjalë për gabim njerëzor apo defekt teknik, por raporti i parë ka ngritur pikëpyetje serioze mbi ndërveprimin dhe koordinimin e pilotëve në ato sekonda kritike.