Afati për regjistrimin e votuesve jashtë Kosovës mbyllet sot

Sot përmbyllet afati për regjistrimin e votuesve jashtë Kosovës për zgjedhjet e 7 qershorit.

Afati për regjistrimin e votuesve nga diaspora për zgjedhjet e parakohshme të 7 qershorit ka filluar më 6 maj dhe përfundon sot, më 17 maj.

Komisioni Qendror i Zgjedhjeve, sërish ka ftuar qytetarët të verifikojnë Qendrën tënde të Votimit. “Verifiko Qendrën tënde të Votimit! Kanë mbetur vetëm edhe 1 ditë për të ndërruar Qendrën e Votimit brenda komunës – afati mbyllet më 17 maj 2026”.

Qytetarët që jetojnë jashtë Kosovës mund të votojnë në dy forma: përmes postës ose në përfaqësi diplomatike. Votimi me postë do të zhvillohet nga 25 maji dhe do të zgjasë 12 ditë, deri më 6 qershor.

Ndërkohë, votimi në përfaqësi diplomatike do të mbahet një ditë para zgjedhjeve në Kosovë, më 6 qershor, nga ora 07:00 deri në 19:00.

Në zgjedhjet e fundit të mbajtura në dhjetor, numri i aplikimeve për regjistrim të votuesve jashtë vendit kishte kaluar mbi 70 mijë.

Po ashtu, nga 6 maji ka nisur edhe periudha për ndërrimin e qendrave të votimit brenda komunës, si dhe për konfirmimin ose kundërshtimin e pasaktësive në listën votuese.

Kryeministri në detyrë, Albin Kurti, mbrëmë i është drejtuar mërgatës, duke i kërkuar të regjistrohet për të votuar në zgjedhjet e 7 qershorit.

Përmes një video-adresimi në rrjetin social Facebook, ai ka theksuar se afati për regjistrim përfundon më 17 maj dhe, në rast të mosregjistrimit, mërgata nuk mund të votojë.

Kujtojmë se Komisioni Qendror i Zgjedhjeve ka miratuar Listën Preliminare të Votuesve për zgjedhjet e parakohshme që do të mbahen më 7 qershor.

Lista Preliminare e Votuesve përmban 2,092,202 votues, pra 15,912 votues më shumë në krahasim me zgjedhjet e parakohshme për Kuvendin e Kosovës, të mbajtura më 28 dhjetor 2026.

KQZ, një ditë më parë, ka certifikuar 902 kandidatë për deputetë nga 21 subjekte politike.