Aksident i rënd në Gjermani: Dy vetura bëhen copë-copë

Një aksident i rëndë trafiku ka ndodhur të shtunën mbrëma në qytetin Heidenheim të Baden-Wurttembergut në Gjermani, ku dy automjete janë përplasur fuqishëm në një kryqëzim.

Sipas policisë, rreth orës 23:00, një 36-vjeçar po drejtonte një Mitsubishi në drejtim të qendrës së Heidenheimit.

Kur mbërriti në një kryqëzim, ai tentoi të kthehej majtas në rrugën Heckentalstraße, por dyshohet se nuk e pa ose nuk i dha përparësi një BMW-je që po vinte përballë.

Në momentin e aksidentit, semaforët në kryqëzim nuk funksiononin. Për këtë arsye, sipas policisë, BMW-ja kishte përparësi.

Përplasja ndodhi në mes të kryqëzimit. Nga fuqia e goditjes, BMW-ja u përplas disa metra dhe rrëzoi dy shtylla të semaforëve.

Në BMW ndodheshin tre të rinj, të moshës 26, 24 dhe 20 vjeç. Të tre pësuan lëndime të lehta dhe u dërguan për trajtim në një klinikë në Heidenheim, shkruajnë mediat gjermane.

Edhe drejtuesi 36-vjeçar i Mitsubishi-t mbeti i bllokuar brenda automjetit, i cili ishte përmbysur pas përplasjes. Ekipet e zjarrfikësve u detyruan ta nxirrnin nga makina duke e prerë atë.

Edhe ai pësoi vetëm lëndime të lehta dhe u dërgua për trajtim të mëtejshëm në Spitalin Universitar të Ulmit.

Dy automjetet pësuan dëme të mëdha dhe nuk mund të lëviznin më, ndaj u tërhoqën nga vendi i ngjarjes. Dëmi i përgjithshëm në automjete dhe sistemin e semaforëve vlerësohet në rreth 26 mijë euro.

Pas dëmtimit të semaforëve, në vendngjarje dolën edhe punëtorët e ndërmarrjeve publike të Heidenheimit për të kryer ndërhyrjet e nevojshme.

Policia po heton rrethanat e sakta të aksidentit, ndërsa ende nuk është bërë e qartë nëse drejtuesi i BMW-së po lëvizte me shpejtësi më të madhe se e lejuara.