Lidhja Demokratike e Kosovës ka mbajtur konferencë për media lidhur me aktakuzën e ngritur nga Prokuroria Speciale për ministren në detyrë, Rozeta Hajdari, Irfan Lipovicën, Hafiz Garën dhe Ridvan Muharremit lidhur me skandalin e rezervave shtetërore.
Anëtari i Kryesisë së kësaj partie, Berat Rukiqi ka thënë se për këtë rast, Kryeministri në detyrë ka ikur poshtë e lartë, e edhe pse në aktakuzë figuron si dëshmitar, ai do duhej sipas tij të ishte i akuzuar.
“Kjo tregon një dështim të komplet zingjirit institucional shtetëror. Kjo tregon qartë natyrën e keqqeverisjes dhe korrupsionin të qeverisë Kurti. Nuk është çështja e vlerës, sa është çështja e natyrës kriminale të marrjes së vendimeve në këtë qeveri. Kryeministri ka ikë poshtë e nalt, nuk është paraqitur si dëshmitar. Në aktakuzë figuron si dëshmitar, do duhej të ishte i akuzuar, pasi ka përgjegjësi penale në këtë rast”, tha Rukiqi para gazetarëve.
Në konferencë foli edhe deputeti Alban Zogaj. Ai tha se “nuk është një rast thjesht administrativ, por që e prek sigurinë kombëtare dhe integritetin institucional të shtetit tonë” dhe se ky rast është i parecedent.
