Kryeministri i Kosovës, Albin Kurti ka uruar gratë me rastin e Ditës Ndërkombëtare të Gruas, duke theksuar nevojën për të drejta, drejtësi dhe veprim konkret për barazinë gjinore.
Kurti tha se në Kosovë po fuqizohen gratë përmes punësimit, mbështetjes ekonomike, rritjes së pjesëmarrjes në vendimmarrje dhe luftës kundër dhunës me bazë gjinore.
Ai përmendi mbi 12 mijë gra të mbështetura në këto fusha si hapa konkretë drejt garantimit të drejtave në jetën e përditshme.
Postimi i plotë:
“Të Drejta. Drejtësi. Veprim.” Kjo është tema e Ditës Ndërkombëtare të Gruas këtë vit. Në mbarë botën, gratë dhe vajzat po kërkojnë të drejtat e tyre, drejtësi e solidaritet, mundësi të barabarta.
Dita Ndërkombëtare e Gruas na e kujton se barazia thërret për veprim. Në Kosovë po fuqizojmë gratë përmes punësimit, mbështetjes ekonomike, rritjes së pjesëmarrjes së tyre në vendimmarrje dhe luftës kundër dhunës me bazë gjinore. Mbi 12 mijë gra të mbështetura në punësim, rritje e pronësisë së grave dhe mekanizma më të fortë mbrojtjeje janë hapa konkret drejt barazisë në vendin tonë, ashtu që të drejtat e grave mos të mbeten vetëm në ligje dhe deklarata – por të garantohen me drejtësi reale, në jetën e përditshme kolektive, në përvojën individuale të secilës.
Barazia nuk është vetëm premtim – është veprim. Dhe ky angazhim vazhdon.
Urime Ditën Ndërkombëtare të Gruas – barazia është punë dhe përgjegjësi e përbashkët!
