Kryeministri i Kosovës, Albin Kurti ka thënë se Radiotelevizioni i Kosovës nuk i raporton Qeverisë së Kosovës.
Këtë deklaratë, ai e bëri në një konferencë për media pas pranoi Raportin e Progresit, e ku mes tjerash përmendej edhe financimi i RTK-së.
Kurti u shpreh se në Kuvend diskutohen çështjet si ajo e RTK-së.
“RTK është tejet e rëndësishme për informimin e qytetarëve me saktësi e korrektësi. Bëjmë mbështetjen me çfarë dijmë e mundemi. RTK nuk i raporton Qeverisë së Kosovës, por Kuvendit. Kuvendi është vendi ku diskutohet, përfshirë, për RTK-në. Do ta vazhdojmë bashkëbisedimin me menaxhmentin aty për të parë se cilat janë nevojat dhe mundësitë. Buxhetimi dhe reformat duhet të shkojnë së bashku”, u shpreh ai.
RTK-ja, televizioni publik që financohet nga taksat e qytetarëve, në vazhdimësi është kritikuar se po i shërben interesave politike të Lëvizjes Vetëvendosje. Përmes raportimeve të njëanshme, hapësirës së madhe për pushtetin dhe trajtimit kritik të mediave që kundërshtojnë qeverinë, është ngritur dyshimi se televizioni publik po përdoret për ta favorizuar narrativën e partisë në pushtet.
Rasti i publikimit të pretendimeve kundër Nacionales dhe Periskopit në vitin 2024, si dhe polemikat rreth emërimeve në pozitat drejtuese të RTK-së, kanë shtuar dyshimet për ndikim politik
