Ambasada e Zvicrës reagon për ligjëratat e Speciales: Nuk promovojnë narrativa të caktuara

Ambasada e Zvicrës ka reaguar pas raportimeve se në gjimnazin “Xhevdet Doda” në Prishtinë është mbajtur një ligjëratë informuese për Dhomat e Specializuara të Kosovës, duke sqaruar mbështetjen e saj për programin e informimit të këtij institucioni.

Në sqarimin e publikuar, Ambasada bën të ditur se që nga viti 2018, Zvicra ka mbështetur aktivitetet e informimit të Dhomave të Specializuara të Kosovës, të cilat janë themeluar përmes një marrëveshjeje ndërkombëtare të ratifikuar nga Kuvendi i Kosovës, duke pasqyruar procesin legjislativ të vendit dhe mandatin demokratik të këtij institucioni.

Sipas Ambasadës, Dhomat e Specializuara të Kosovës janë një organ gjyqësor i pavarur dhe, përmes Zyrës së Informimit, angazhohen me një gamë të gjerë akterësh për të shpërndarë informacione publikisht të disponueshme mbi mandatin dhe punën e tyre, për të dëgjuar pikëpamjet e qytetarëve dhe për t’iu përgjigjur pyetjeve, pa promovuar narrativa të caktuara.

Më tej, theksohet se Programi i Informimit zbatohet në bashkëpunim të ngushtë me organizatat e shoqërisë civile, të cilat ndihmojnë në lehtësimin e dialogut dhe në inkurajimin e një debati publik të informuar mbi çështje me interes publik.

Ambasada e Zvicrës ka nënvizuar se mbështetja e saj synon transparencën, informimin e qytetarëve dhe forcimin e sundimit të ligjit, duke theksuar se kjo mbështetje nuk nënkupton ndikim në përmbajtjen e aktiviteteve dhe as promovim të qëndrimeve të caktuara.