Ambasadori amerikan në NATO: Nuk do t’i tolerojmë sulmet hibride, është e papranueshme

Vendet anëtare të NATO-s nuk duhet të tolerojnë veprimet e qëllimshme të luftës hibride dhe Shtetet e Bashkuara do të qëndrojnë përkrah vendeve teksa ato përballen me incidente të tilla, tha të shtunën Matthew Whitaker, ambasadori i SHBA-së në NATO.

Whitaker tha se përpjekja e muajit të kaluar për një sulm me dron në aeroportin Leipzig/Halle të Gjermanisë, për të cilin Berlini ka fajësuar Rusinë, ishte më shqetësuese se incidentet e tjera të fundit me të cilat janë përballur vendet anëtare të NATO-s, për shkak të dronëve rusë që synonin Ukrainën dhe që kanë devijuar nga trajektorja.

“Pastaj janë ato që do t’i quaja veprime hibride më shqetësuese, siç pamë në Leipzig, ashtu siç kemi parë në Poloni”, tha Whitaker, duke folur në margjinat e një konference biznesi në Itali, raporton Reuters

Ai tha se vendet anëtare të NATO-s duhet të jenë të përgatitura, vigjilente dhe gjithashtu të përcjellin një mesazh të fuqishëm kur përballen me ngjarje të tilla.

“Nëse mund të identifikojmë se kush po e bën këtë – gjë që e bëri Gjermania – duhet të sigurohemi që të shprehim fuqishëm se kjo është e papranueshme dhe se nuk do ta tolerojmë”, tha Whitaker.

Ai shtoi se mund të jenë në shënjestër edhe infrastrukturat kritike, përfshirë asetet energjetike, dhe se ato duhet të monitorohen nga autoritetet kombëtare.

Përgjigjja ndaj këtyre sfidave është kryesisht përgjegjësi kombëtare, por Shtetet e Bashkuara i mbështesin vendet kur ato përballen me këto veprime, tha ai.