Ambasadori i BE-së në Kosovë takim me Zogaj nga KGJK: BE-ja do të vazhdojë të mbështesë reformën gjyqësore

Ambasadori i Bashkimit Evropian në Kosovë, Aivo Orav ka takuar kryetarin në largim të Këshillit Gjyqësor, Albert Zogaj për të cilin shprehu vlerësimin për kontributin në reformën gjyqësore.

“Ambasadori i BE-së në Kosovë, Aivo Orav, pati nderin të takohej sot me Kryetarin në largim të Këshillit Gjyqësor të Kosovës, Albert Zogaj. Orav shprehu vlerësimin e tij për kontributin e Zogajt në reformën gjyqësore, në përputhje me angazhimet e Kosovës për Sundimin e Ligjit, duke theksuar nevojën që udhëheqja e re e Këshillit të vazhdojë të punojë në të njëjtën rrugë drejt një sistemi drejtësie të pavarur, të përgjegjshëm dhe efikas”, thuhet në shkrimin e zyrës së BE-së.

Po ashtu Orav ka thënë se BE do të vazhdojë të mbështesë Kosovën në reformën gjyqësore.

“Si partneri më i besueshëm i Kosovës dhe ofruesi më i madh i ndihmës financiare, BE-ja do të vazhdojë të mbështesë reformën gjyqësore nëpërmjet financimit të ri IPA (15 milionë euro) dhe Planit të Rritjes”, thuhet në njoftim.