Arrestimi i Sami Mazrekut e Valon Berishës, reagon Byroja Kosovare e Sigurimeve: Rasti i sotëm është iniciuar nga ne

Prokuroria e Prizrenit ka nisur sot një aksion të gjerë hetimor bashkë me rreth 300 zyrtarë policorë të cilët intervenuan në bastisje të ndryshme.

Ky aksion vuri nën pranga ish-drejtorin e Byrosë Kosovare të Sigurimeve, Sami Mazrekun dhe ish-drejtorin e Financave , Valon Berishën.

E pas kësaj një njoftim zyrtarë e lëshoi edhe Byroja Kosovare e Sigurimeve.

Byroja Kosovare e Sigurimeve ka bërë të ditur se rasti i sotëm, i cili li po trajtohet nga Prokuroria Themelore në Prizren dhe për të cilin janë raportuar bastisje dhe veprime hetimore, është iniciuar nga vetë BKS-ja në cilësinë e palës së dëmtuar, si rezultat i konstatimeve të identifikuara në raportin e Auditimit të Brendshëm.

“Në kuadër të angazhimit të vazhdueshëm të Byrosë për transparencë, integritet institucional dhe mbrojtje të interesit publik, pas evidentimit të shkeljeve serioze dhe dyshimeve për keqpërdorime, BKS ka ndërmarrë veprime të menjëhershme ligjore, duke i adresuar gjetjet përkatëse tek organet kompetente të rendit dhe drejtësisë. Byroja Kosovare e Sigurimeve ka bashkëpunuar dhe vazhdon të bashkëpunojë në mënyrë të plotë dhe aktive me Prokurorinë dhe Policinë e Kosovës, duke vënë në dispozicion të gjithë dokumentacionin dhe informacionin e nevojshëm për zhvillimin e hetimeve”,thuhet në njoftim.

Gjithashtu u tha se BKS mbetet e përkushtuar në forcimin e mekanizmave të kontrollit të brendshëm, parandalimin e keqpërdorimeve dhe garantimin e menaxhimit të përgjegjshëm të mjeteve financiare, në përputhje të plotë me legjislacionin në fuqi.

“Byroja Kosovare e Sigurimeve rithekson se respekton parimin e prezumimit të pafajësisë dhe beson se organet e drejtësisë do ta zbardhin plotësisht këtë rast, duke vepruar në përputhje me ligjin.Për çdo zhvillim të mëtejmë, opinioni publik do të njoftohet në kohë përmes kanaleve zyrtare të Byrosë. Byroja Kosovare e Sigurimeve shpreh falënderim dhe vlerësim të veçantë për Prokuroritë kompetente dhe Policinë e Kosovës, për angazhimin profesional, veprimet e shpejta dhe bashkëpunimin korrekt institucional në trajtimin e këtij rasti. Ky bashkëpunim dëshmon përkushtimin e përbashkët për forcimin e sundimit të ligjit, luftimin e keqpërdorimeve dhe mbrojtjen e interesit publik”.

Ndryshe Aksioni është duke u zhvilluar lidhur me kryerjen e disa veprave penale: “keqpërdorim i besimit”, “keqpërdorim i autorizimeve në ekonomi”, “ndihmë në keqpërdorim të besimit” dhe falsifikim të dokumentit”.

Përpos numrit të madh të policëve që po marrin pjesë në këtë aksion, në hetim të rastit janë përfshirë një numër i madh i prokurorëve.

E të dyshuar në këtë rast deri tani thuhet se janë rreth 45 persona.

Siç theksohet, dëmi që pretendohet nga Prokuroria se është shkaktuar buxhetit të Byrosë Kosovare të Sigurimit kap vlerën e 1 milion eurove.

Madje theksohet se Mazreku dhe Berisha kishin marrë llogaritë bankare të 45 qytetarëve tek të cilët kanë transferuar mjete financiare përmes marrëveshjeve të parapërgatitura, nga të cilat kanë fituar mijëra euro.