Arrestohen dy kosovarë dhe një shtetase shqiptare, iu gjendet drogë në veturë

Tre persona, dy burra nga Kosova dhe një grua shtetase e Shqipërisë, janë arrestuar të mërkurën mbrëma në Pejë, nën dyshimin për blerje, shpërndarje dhe shitje të paautorizuar të narkotikëve.

Sipas Policisë, gjatë kontrollit të veturës me të cilën po udhëtonin, në bagazh është gjetur dhe konfiskuar rreth një kilogram substancë e dyshuar narkotike e llojit marihuanë.

Gjithashtu, si prova materiale janë konfiskuar para të gatshme, tre telefona celularë, dy thika dhe vetura me të cilën po udhëtonin.

Me vendim të prokurorit, të tre të dyshuarit janë dërguar në mbajtje.