Asambleisti më i votuar i PDK-së në Drenicë reagon ashpër: Në çdo fushatë, gojën e kanë plot me UÇK-në, ndërsa aty ku duhet të tregojnë veten, i harrojnë çlirimtarët

Fikret Rexhepi, asambleisti më i votuar nga PDK në Drenicë, ka dalë me reagim të ashpër pas zhvillimeve të fundit në lidhje me Ligjin për Specialen, shkruan GazetaDemos

Familjari i dy heronjëve Rexhepi ka shkruar se pret nga deputetët e PDK-së në Kuvend që të reflektojnë mbi përgjegjësit e tyre politike, duke shtuar se partia duhet të jetë transparente para qytetarëvë në lidhje me Ligjin për Specialen.

"Në çdo fushatë, gojën e kanë plot me UÇK-në, ndërsa aty ku duhet të tregojnë veten, i harrojnë Hashim Thaçin, Kadri Veselin, Rexhep Selimin dhe Jakup Krasniqin! I harrojnë njerëzit që sakrifikuan gjithçka për lirinë e Kosovës. I harrojnë obligimet dhe detyrat e tyre si deputetë, aq sa sot qytetarët, me të drejtë, e vënë në dyshim nëse këta deputetë e kuptojnë vërtet se për çfarë shkojnë në Kuvend", u shpreh ai.

Rexhepi u shpreh se vlerat e UÇK-së u përdorën për pazare politike, e kjo gjë është e pafalshme.

"Nëse deputetët nuk janë në gjendje t’i përfaqësojnë këto vlera, atëherë nuk e meritojnë besimin e qytetarëve. Qytetarët nuk ua dhanë votën për t’i zënë karriget e për të përfituar një pagë personale, por për t’i përfaqësuar me dinjitet", thuhet në postimin e tij në Facebook.

Postimi i plotë:

KUR HARROHEN IDEALET, POLITIKA REDUKTOHET NË INTERES TË PASTËR PERSONAL!

Pres nga deputetët e zgjedhur të Partisë Demokratike të Kosovës që të reflektojnë mbi përgjegjësinë e tyre politike, të japin kontributin e tyre në përputhje me premtimet që ua kanë dhënë votuesve dhe, mbi të gjitha, të jenë vigjilentë kur është në pyetje ideali kombëtar dhe shtetëror. Partia Demokratike e Kosovës duhet të jetë transparente para qytetarëve për gjithçka që ka të bëjë me Ligjin për Dhomat e Specializuara.

Në çdo fushatë, gojën e kanë plot me UÇK-në, ndërsa aty ku duhet të tregojnë veten, i harrojnë Hashim Thaçin, Kadri Veselin, Rexhep Selimin dhe Jakup Krasniqin! I harrojnë njerëzit që sakrifikuan gjithçka për lirinë e Kosovës. I harrojnë obligimet dhe detyrat e tyre si deputetë, aq sa sot qytetarët, me të drejtë, e vënë në dyshim nëse këta deputetë e kuptojnë vërtet se për çfarë shkojnë në Kuvend.

Ne nuk ju votuam që Albin Kurtit t’i zgjatet mandati qeverisës. Ne ju votuam që të vazhdoni të angazhoheni për të mirën e Kosovës.

Vlerat e UÇK-së u përdorën për pazare politike. Kjo është e pafalshme dhe për këtë faturën do ta paguani shtrenjtë!

PDK-ja nuk mund të kërkojë besimin e qytetarëve duke u mbështetur vetëm në historinë e saj, ndërkohë që, përballë vendimeve të rëndësishme, shmang përgjegjësinë. Historia nuk duhet të përdoret vetëm kur kërkohen vota; ajo kërkon qëndrim, parime dhe guxim, edhe në momentet më të vështira.

PDK-ja votohet për këto vlera, prandaj servilizmi politik nuk falet lehtë.

Nëse deputetët nuk janë në gjendje t’i përfaqësojnë këto vlera, atëherë nuk e meritojnë besimin e qytetarëve. Qytetarët nuk ua dhanë votën për t’i zënë karriget e për të përfituar një pagë personale, por për t’i përfaqësuar me dinjitet.

Kosova është më e madhe se çdo parti, liria është më e shtrenjtë se çdo mandat dhe parimet jetësohen vetëm atëherë kur nuk sakrifikohen për pushtet!