Bajrami në Ditën e Lirisë së Shtypit: Pa media të lira nuk ka demokraci

Në Ditën Botërore të Lirisë së Shtypit, deputetja e LDK-së, Hykmete Bajrami ka vlerësuar punën e gazetarëve, duke theksuar se liria e medias është shtyllë e domosdoshme e demokracisë.

Ajo ka falënderuar gazetarët për punën e tyre, duke thënë se shumë skandale dhe keqpërdorime janë zbuluar falë raportimeve të tyre, pavarësisht presioneve dhe sfidave me të cilat përballen.

Bajrami theksoi se gazetarët shpesh punojnë në kushte të vështira dhe nën presion, por megjithatë vazhdojnë të qëndrojnë në anën e së vërtetës.

“Pa media të lira nuk ka demokraci. Një shoqëri pa media të lira është e pambrojtur ndaj pushtetit,” u shpreh ajo.

Ajo u bëri thirrje gazetarëve që të vazhdojnë punën e tyre pa u ndalur, pavarësisht kush e udhëheq vendin, duke theksuar se politikanët janë të zgjedhur për të shërbyer, jo për të sunduar.

Në fund, Bajrami shprehu respekt për të gjithë gazetarët që, sipas saj, çdo ditë zgjedhin të qëndrojnë në anën e së vërtetës.