Kryeparlamentari Dimal Basha në konferencën për media është pyetur se në çfarë baze ligjore është mbështetur kur dhe vendosi të ndante votimin, duke mos u bërë në pako, gjë për të cilën ai tha se s’pati konsensus nga komunitetet joshumicë joserbe .
Sipas tij, këta të fundit s’pranuan të shkojnë në pako me komunitetin serb.
Ai tha se një konsensus të tillë e patën tri partitë e mëdha, Vetëvendosje, Partia Demokratike e Kosovës dhe Lidhja Demokratike e Kosovës.
“Siç e dini rregullorja e punës së Kuvendit thotë zgjedhja e nënkryetarëve, Nëse e dëgjoni seancën, kam treguar që ka konsensus që tri partitë e mëdha, VV, LDK dhe PDK kanë konsensus të shkojnë te votimi në pako, kurse komunitetet joshumicë joserbe dalin e deklarojnë që ata nuk dojnë të shkojnë në pako me komunitetin serb, pra kërkojnë të votohen veç e veç. Në atë moment unë tregoj që nuk ka konsensus dhe me që s’ka, unë propozoj që të votohen veç e veç. Pastaj ka ardhur votimi i Emilija Rexhepit, e cila ka marrë votat e mjaftueshme për t’u zgjedhur nënkryetare e Kuvendit, e këtu ka marrë pjesë edhe Lista Serbe” ka qenë arsyetimi i Bashës.
