“Blerje klasike e votave”: Kurti kritikohet ashpër për ndarjen e 100 eurove për disa kategori në prag të zgjedhjeve

Vendimi i Qeverisë në detyrë për miratimin e pakos për përballje me inflacionin 2.0, e cila parasheh ngritjen e shtesave për lehona dhe ndarjen nga 100 eurove për pensionistët, studentët, fëmijët dhe punëtorët e sektorit privat ka nxitur reagime të shumta në vend.

Ky veprim i qeverisë i marrë dy javë para zgjedhjeve është kritikuar ashpër nga pozita, shoqëria civile dhe njohësi e rrethanave politike në vend.

Ata kanë vlerësuar se kjo është blerje e pastër votave nga qytetarët e varfër të Kosovës.

Kryetari i LDK-së, Lumir Abdixhiku, ka bërë me dije se kjo është blerje e votave dhe propagandë.

Në profilin e tij në Facebook, kreu i LDK-së ka shkruar se kjo është ofendim.

“Blerje votash, propagandë. fyerje, ofendime, kriza të njëpasnjëshme. Çdo mjet i mundshëm për të qëndruar me çdo çmim në pushtet. Asnjë ide. Asnjë projekt. Asnjë punë. Kjo nuk është pako e inflacionit. Kjo është pako e tentimit për blerje vote. Një përpjekje e vonshme për të mbuluar dështimin qeverisës me paranë e vet qytetarëve. Një ofendim zgjedhor për dinjitetin dhe nevojat reale të njerëzve të vendit, të atyre që i lë si të parafundit në Evropë. Të parafundit!”, ka shkruar ai, duke shtuar se populli i Kosovës nuk blihet.

“Populli i Kosovës nuk blihet. E ardhmja e tyre nuk është në shitje. Kosovës i duhet një kapitull i ri. Një kapitull ku politikanët nuk kujtohen për qytetarët vetëm në prag zgjedhjesh. Ku mirëqenia nuk shpërndahet si favor elektoral, por ndërtohet si politikë e përhershme shtetërore. Ku pagat e dinjitetshme, mbështetja për familjet, zhvillimi ekonomik, investimet e mëdha e kujdesi për qytetarin nuk janë mjete për votë, por detyrim i Republikës. I një Republike që zhvillohet e s’pranoj të jetë në fund të Evropës!”, ka shkruar ai.

Vendimi është kritikuar edhe nga kandidatja e PDK-së për deputete, Ariana Musliu-Shoshi.

Ajo ka bërë me dije shteti nuk ndërtohet me lëmosha elektorale.

“Qytetarët nuk kanë nevojë për një qeveri që i varfëron gjatë gjithë mandatit, e provon ta blejë dinjitetin e tyre me 100 euro! Shteti nuk ndërtohet me lëmosha elektorale, por me dinjitet, zhvillim dhe shpresë për të ardhmen”, ka shkruar ajo në profilin e saj në Facebook.

Kurse, kandidati i PDK-së për deputet, Artan Behrami, e ka ftuar prokurorinë që të merret me këtë veprim të Qeverisë.

“Prokuroria duhet tani të zbarkojë në Qeverinë e Kosovës. Kjo është blerje klasike e votës, është ndikim i drejtpërdrejtë te votuesit. Sipas Kodit Penal të Kosovës: ‘keqpërdorimi i varësisë ekonomike/profesionale ndikon te votuesi për të votuar në një mënyrë të caktuar ose të mos votojë, dënohet me 1 deri në 5 vjet burgim’”, ka shkruar ai.

Çka parasheh pako?

Kryeministri në detyrë Albin Kurti ka treguar përmbajtjen pakos për përballje me inflacionin 2.0.

Në adresimin e tij para kabinetit qeveritar, ai e ka thënë se Qeveria asnjëherë nuk do t`i lerë vetëm qytetarët.

“Sot kam kënaqësinë të ju njoftoj për pakon për përballjen me inflacionin 2.0, të cilën e kemi dizajnuar dhe do ta miratojmë sot me masat si në vijim: mbështetjeje e njëhershme prej 100 euro për pensionistët, mbështetje e njëhershme prej 100 euro për fëmijë, mbështetej e njëhershme prej 100 euro për punonjësit e sektorit jo publik, mbështesje e njëhershme prej 100 eurosh për studentet aktiv”, ka thënë Kurti.

Ai ka treguar për kohen e ndarjes së këtyre pagesave.

Ai ka bërë me dije se pagesat për pensionistë dhe studentët do të bëhet para festes së Bajramit.

“Meqenëse për pensionistët dhe fëmijët nuk do të ketë nevojë për aplikim, sepse i kemi listat e përfituesve tashmë, do të synojmë që pagesat e njëhershme për familjet përfituese t`i bëjmë në fillim të javës që vjen, pra para ftesës se bajramit. Ashtu që secila familje të ndjehet e barabartë me atë ditë feste, duke e ditur se dora e mirë e shtetit kujdeset për ta. Kurse, për të punësuarit e sektorit jo publik dhe studentët, nga ministri i financave jam njoftuar që nevojitet procedurë aplikimi e cila do të hapet në javën e ardhshme”, ka deklaruar Kurti.

Më pas, Kurti ka prezantuar edhe një vendim tjetër të Qeverisë.

Ai ka bërë me dije se nga ky muaj qeveria do të rrisë edhe pagesat mujore për nënat lehona.

Ai ka treguar se nga ky muaj kjo pagesë do të jetë 500 euro.

“E super lajmi që dua të ndaj me ju sot është se nga ky muaj do t`i rrisim shtesat për lehona. Përderisa me qeveritë e kaluar shtesat për lehona ishin zero euro, thuajse ky shtetet nuk kishte nëna lehona, për herë të parë me qeverisjen tonë i nisem ato duke i paguar nga 170 euro për 6 muaj me radhë për lehona e papunë dhe 3 muaj për ato të punësuarat mbi pagesën që tashme e marrin sipas ligjit të punës”, ka thënë ai, duke treguar nivelin e rritjes.

“Nga 325.9 euro në muaj në 500 euro në muaj, sa paga minimale. Me fjaltë tjera nuk po e presim korrikun, por rritjen po e bëjmë qysh tani. Nga ky muaj e tutje secila nën lehonë do të përfitojë mbështetej mujore prej 500 në muaj”, ka thënë Kurti.