Deputetja e Aleancës, Albana Bytyqi, ka deklaruar se opozita nuk është duke tentuar të bllokojë krijimin e institucioneve të Kosovës, duke e akuzuar Lëvizjen Vetëvendosje dhe kryeministrin në detyrë, Albin Kurtin, për situatën e krijuar.
E ftuar në FIVE në TV Dukagjini, Bytyqi tha se qëllimi i tyre është zgjidhja e problemeve dhe konstituimi i institucioneve, ndërsa sipas saj, përgjegjësia për bllokadën bie mbi LVV-në.
“Ne kemi qenë të i zgjidhim problemet, të i zgjedhim institucionet ne nuk jemi duke dashur të i bllokojmë institucionet. Për t’i bllokuar institucionet po dihet kush është, është LVV dhe Albin Kurti.
Sepse i ka votat për kryetar të Kuvendit dhe konstituimin e Kuvendit mund ta bëjë pa problem. Edhe pa opozitën. Mirëpo ajo çka po e bën Kurti duke i fyer deputetët, duke i sharë në mënyra të ndryshme ti s’po len më hapësirë as për të bashkëpunuar. Dhe krejt kjo është esenca kryesore…Krejt kjo çka po insiston zoti Kurti është që të mos i bëj institucionet”, ka thënë Bytyqi.
