Sekretarja e Përgjithshme e PDK-së, Vlora Çitaku, ka komentuar intervistën e mbrëmshme të ish-presidentit Hashim Thaçi nga Haga, të cilën e ka dhënë për emisionin “Debat Plus”.
Ajo ka bërë me dije se Hashim Thaçi fatin e tij e ka shkruar vetë.
Në profilin e saj në Facebook, ajo ka shkruar se jeta dhe historia e Thaçit nuk janë produkt i privilegjit dhe rehatisë
“Hashim Thaçi fatin e tij e ka shkruar vetë. Nuk ka pasur as rastësi, as fat, e as rrethana që e kanë privilegjuar. Jeta dhe historia e tij nuk janë produkt i privilegjit e i rehatisë. Në fakt, krejt e kundërta. Gjithmonë kundër erës. Gjithmonë duke e sfiduar atë që dukej e pamundur. Me guxim, duke na dhënë edhe neve guximin të ëndërrojmë. Të imagjinojmë. Kosovën e lirë. Kosovën aleate me botën demokratike. Kosovën shtet”, ka shkruar ajo, duke dhënë detaje tjera.
“Edhe kjo betejë në Gjykatën Speciale, e pranuar me vetëdije prej tij, duke e ditur se ai do të ishte caku i parë, është bërë mbi të njëjtat premisa. Sepse shumë moti, siç e tha edhe vetë sonte në intervistë, Hashim Thaçi nuk i takonte më vetëm vetes së tij. Ka diçka të jashtëzakonshme te njerëzit që i dedikohen një kauze deri në vetëmohim. Që e vendosin atë para rehatisë, para interesit personal, madje edhe para lirisë së tyre. Hashim Thaçi ka mundur lehtësisht të vritej në luftë. Rastësisht është gjallë”, ka shkruar ai.
