Delegatët e organizatës “Shqiptarët për Amerikën” takohen me Prattipatin

Delegacioni i organizatës Albanians for America (AFA), i përbërë nga Gino Mulliqi, Gëzim Rushiti dhe Janinë Memeti, zhvilloi një takim me të Ngarkuarën me Punë të Shteteve të Bashkuara të Amerikës në Kosovë, Anu Prattipati. Gjatë takimit, palët riafirmuan partneritetin e fuqishëm ndërmjet Kosovës dhe Shteteve të Bashkuara dhe theksuan rëndësinë e thellimit të bashkëpunimit në fushat me interes të përbashkët.

Diskutimet u përqendruan në mundësitë për zgjerimin e bashkëpunimit ekonomik, rritjen e investimeve amerikane në Kosovë, avancimin e sektorit të energjisë, përfshirë projektet e gazit natyror të lëngshëm (LNG), si dhe krijimin e vendeve të reja të punës përmes investimeve strategjike.

Përfaqësuesit e AFA-së theksuan se një Kosovë me institucione të fuqishme dhe qeverisje të qëndrueshme është thelbësore për forcimin e besimit të investitorëve, avancimin e zhvillimit ekonomik dhe thellimin e mëtejshëm të partneritetit me Shtetet e Bashkuara.

Në këtë kontekst, delegacioni i AFA-së bëri thirrje për rifillimin e Dialogut Strategjik Kosovë–SHBA, si një mekanizëm që do të mundësonte një koordinim më të thellë dhe afatgjatë në fushat e sigurisë, ekonomisë, energjisë, investimeve dhe zhvillimit institucional.

Delegacioni theksoi gjithashtu rolin e pazëvendësueshëm të komunitetit shqiptaro-amerikan në forcimin e marrëdhënieve ndërmjet Kosovës dhe Shteteve të Bashkuara. Ai nënvizoi kontributin e kahershëm të këtij komuniteti në ndërtimin e urave të bashkëpunimit ndërmjet dy vendeve dhe në krijimin e mundësive të reja për zhvillim ekonomik dhe investime.

Delegacioni i AFA-së shprehu mirënjohjen për mbështetjen e vazhdueshme të Shteteve të Bashkuara ndaj Kosovës dhe riafirmoi përkushtimin e organizatës për forcimin e mëtejshëm të marrëdhënieve Kosovë–SHBA dhe avancimin e interesave të përbashkëta.