“Dil jashtë ore, dil jashtë shtrihu”, Pamje të reja nga arrestimi i autorit të vrasjes së turistit në Ksamil

“Dil jashtë ore, dil jashtë, shtrihu”, ky është momenti kur forca të shumta policie lokalizojnë dhe arrestojnë autorin e dyshuar të vrasjes së turistit në Ksamil, Sokrat Vata, 29 vjeç.

Ai është lokalizuar në Levan, i fshehur në bagazhin e një makine, që drejtohej nga një vajzë turke, ndërsa pasagjer ishte një tjetër shtetas nga Turqia.

Në momentin që policia ndalon mjetin dhe e rrethon, efektivët kanë hapur menjëherë bagazhin ku autori i dyshuar shihet i shtrirë, fshehur pas një valixheje të kuqe, me një peshqir blu i mbuluar, me një palë pantallona të shkurta ngjyrë të hapur dhe të mbuluara nga gjaku. Ai shfaqet pa bluzë, ndërsa duart i ka ende me gjak.

Ndërsa disa prej efektivëve kanë neutralizuar Vatën, i cili duket se nuk bën rezistencë, policët e tjerë u kanë vënë prangat shoferes dhe pasagjerit.

Shoferja shfaqet e habitur kur nga bagazhi del autorit i dyshuar, duke lënë të kuptohet se ndoshta nuk e dinte që ai ndodhej aty.

Ndërkohë pasagjeri duket se fillimisht ka bërë rezistencë, por është neutralizuar nga policia. Të dy këta shtetas janë duke u marrë në pyetje nga autoritetet, për të zbuluar se çfarë rolin kanë pasur në këtë ngjarje të rëndë.