Anëtari i Lëvizjes Vetëvendosje, Enver Dugolli, ka njoftuar sot përmes një deklarate publike se është intervistuar në Prokurorinë Speciale të Republikës së Kosovës në cilësinë e të paditurit për nxitje të urrejtjes.
Padi kundër tij është ngritur nga pjesëtari i Policisë së Kosovës, Shpend Istogu, i biri i Ajet Istogut.
Dugolli thotë se gjatë viteve ’80 ka qenë viktimë e dhunës fizike, psikike dhe emocionale nga Ajet Istogu dhe se kjo dhunë ka lënë pasoja edhe në shëndetin e tij.
“Padia është ngritur nga një pjesëtar i Policisë së Kosovës, Shpend Istogu, djali i ish-oficerit famëkeq të UDB-së, Ajet Istogu, i njohur për torturat e rënda ndaj të rinjve, intelektualëve dhe punëtorëve shqiptarë gjatë viteve ’80”, ka shkruar Dugolli, i cili thotë se është i gatshëm të përballet ballëhapur me drejtësinë, duke qenë “i qetë dhe i bindur në të drejtën e tij”.
Lidhur me këtë intervistimin nga Prokuroria reagoi vet Dugolli ku tha se nuk do mendonte që fëmija i një UDBASHI do të bënte këtë.
“Nuk e kam mendu kurrë se një familjar i një UDBASH-i të njohur e mirënjohur në territorin e Kosovës sidomos në Drenicë, pra skam mendu që ata do të veprojnë në këtë mënyrë të paktën heshtja do të kishte qenë nëse skanë kurajo që të kërkojnë falje”, tha ai.
