Dyshohet se sulmoi dhe kanosi disa të rinj, arrestohet polici në Gjilan

Një zyrtar policor është arrestuar të mërkurën në Gjilan nga hetuesit e Inspektoratit Policor të Kosovës, nën dyshimin se ka kryer veprat penale “sulm”, “lëndim i lehtë trupor” dhe “kanosje”.

Sipas IPK-së, rasti ka ndodhur më 13 gusht 2026, në rrugën “Lidhja e Prizrenit” në Gjilan, ku zyrtari policor, i cili në atë kohë ishte jashtë detyrës zyrtare, dyshohet se është përfshirë në një mosmarrëveshje me disa të rinj.

“Hetuesit e IPK-së disa ditë më herët janë njoftuar përmes një ankese në zyrën rajonale të IPK-së në Gjilan lidhur me dyshimet se ky zyrtar policor, sa ishte jashtë detyrës zyrtare, kishte kryer veprime të kundërligjshme”, thuhet në komunikatën e Inspektoratit.

Pas pranimit të ankesës, IPK-ja, në koordinim me Prokurorinë Themelore në Gjilan, ka nisur hetimet për të sqaruar rrethanat e rastit.

“Hetuesit, në koordinim me Prokurorin e Shtetit, kanë ndërmarrë veprimet e nevojshme hetimore”, njofton IPK-ja.

Pas veprimeve fillestare hetimore, zyrtari policor është arrestuar të mërkurën. Me vendim të prokurorit, atij i është caktuar masa e ndalimit prej 48 orësh.

Ndërkohë, IPK-ja ka rekomanduar edhe suspendimin e zyrtarit policor deri në përfundimin e procedurave përkatëse.

Hetimet për rastin do të vazhdojnë nga hetuesit e IPK-së në bashkëpunim dhe konsultim të vazhdueshëm me prokurorin përgjegjës.