E rëndë: Dalin detaje të reja – Viktimat e tragjedisë në Malishevë i takojnë moshës 9, 12 dhe 35

GazetaDemos ka raportuar pak më parë për një ngjarje tragjike të ndodhur sot rreth orës 12:55, në lagjen “Mirdita”, në Malishevë, atje ku humbën jetën tre persona. Siç mësoi GazetaDemos ekskluzivisht nga burimet e veta, viktimat e kësaj tragjedie janë babai dhe dy fëmijët e tij, të cilët vdiqën si pasojë e zjarrit që përshiu banesën e tyre pas një incidenti.

Viktimat e kësaj tragjedia i takojnë moshës nëntë, 12 dhe 35-vjeçare.

Lajmin për GazetënDemos e ka konfirmuar edhe zëdhënësi i Policisë, Sheremet Elezaj.

I njëjti bëri të ditur se menjëherë pas pranimit të informacionit, në vendin e ngjarjes kanë dalë njësitë kompetente policore, zjarrfikësit dhe ekipet emergjente.

Me t’u dërguar në QKMF-në e Malishevës, u konstatua se personat e lartëcekur ishin pa shenja jeta.

Gjithashtu bëhet e ditur se ekipet intervenuese kanë arritur ta lokalizojnë zjarrin.

“Në këtë banesë janë gjetur tre persona të gjinisë mashkullore (një i rritur dhe dy fëmijë), të cilët janë dërguar në Qendrën e Mjekësisë Familjare në Malishevë ku është konstatuar se të njëjtit ishin pa shenja jete. Zjarri është lokalizuar dhe nuk është raportuar për pasoja të tjera. Lidhur me rastin është njoftuar edhe prokurori i shtetit dhe aktualisht janë duke u ndërmarrë të gjitha veprimet e nevojshme hetimore për të sqaruar rrethanat dhe shkaqet e kësaj ngjarjeje”, tha Elezaj.