Kandidati për deputet nga Partia Demokratike e Kosovës, Enver Hoxhaj, ka deklaruar se refuzimi i projektit të gazit amerikan nga Qeveria e Kosovës do të sjellë pasoja të rënda politike dhe strategjike për vendin.
Hoxhaj tha se kishte paralajmëruar më herët për këtë çështje në paraqitjet e tij publike.
“Unë kam bërë përpjekje të paralajmëroj, duke qenë mysafir në një emision, se qeveria e ka refuzuar një projekt të tillë. Kushdo që i del përpara gazit amerikan si projekt për ta ndaluar, do të ketë pasoja tektonike. Ky është një rirreshtim i madh i Perëndimit. Ka të bëjë me mënyrën se si e sheh Amerika Kosovën, Ballkanin dhe pozitën e saj në botë, për vijat ndarëse. Do të ketë pasoja fatale për fatin e qeverisë pas zgjedhjeve”, deklaroi Hoxhaj. Duke folur për zgjedhjet e 7 qershorit, ai tha se ato janë ndër më të rëndësishmet në historinë politike të Kosovës.
“Mendoj se zgjedhjet e 7 qershorit nuk kanë qenë të ngjashme asnjëherë me ndonjë palë zgjedhje që janë mbajtur në Kosovë. Do të ketë rirreshtim. Do të mbesim demokraci apo diktaturë. Siguria energjetike është projekti i parë për Kosovën”, u shpreh Hoxhaj në Klan Kosova.
