Esat Shala: U intervistova nga Policia, personi që e përmenda për krime lufte më denoncoi për kanosje

Esat Shala, i njohur për aktivitetin e tij rreth dokumentimit të krimeve të luftës të kryera në Kosovë, në një intervistë televizive gjatë ditës së enjte ka shfaqur pretendime për një qytetar nga Prizreni se ka marrë pjesë në Masakrën e Krushës.

Shala kishte deklaruar se do të vepronte personalisht ndaj tij, nëse shteti s’do të ndërmerrte veprime.

Këto fjalë të tij kanë bërë që personi i apostrofuar të ankohet në Polici, gjë të cilën e kanë konfirmuar edhe nga Policia e Prizrenit.

Shaqir Bytyqi ka thënë se personi i apostrofuar nga Shala është paraqitur në Polici si ankues dhe pas intervistimit është liruar.

Në polici deklaratë ka dhënë edhe Esat Shala. Ky i fundit ka treguar se është intervistuar në polici, meqë personi që e ka përmendur në intervistë e ka denoncuar për kanosje.

“Po më kanë intervistu. Sipas rregullave, por s’më kanë arrestuar”, ka thënë Shala për Express.

“Ai më ka denoncu mu atje për kanosje. Që kam folë, që kam thanë kam me arrestu me kindapu”, ka sqaruar Shala.