Fatos Qerimaj ngre alarmin për presione politike: Nuk do të hesht përballë padrejtësive

Fatos Qerimaj ka njoftuar se ka dorëzuar ankesë zyrtare në Këshillin e Pavarur Mbikëqyrës për Shërbimin Civil të Kosovës, kundër vendimit për transferimin e tij nga pozita e Drejtorit të Autoritetit të Pellgjeve Lumore.

Sipas reagimit të tij, ankesa është dorëzuar përmes avokatit Hajzer Salihu, duke e cilësuar vendimin si të kundërligjshëm dhe në kundërshtim me Ligjin për Procedurën e Përgjithshme Administrative dhe Ligjin për Zyrtarët Publikë.

Qerimaj ka bërë të ditur se është kërkuar edhe pezullimi i zbatimit të vendimit deri në shqyrtimin përfundimtar nga KPMSHCK-ja.

Ai ka renditur disa shkelje që pretendon se janë bërë gjatë procedurës, përfshirë mungesën e bazës ligjore, mungesën e arsyetimit juridik, cenimin e procedurave administrative dhe veprime arbitrare ndaj tij si zyrtar publik.

Në reagimin publik, Qerimaj ka akuzuar për ndërhyrje politike dhe tentativa për largimin e profesionistëve nga administrata publike, duke theksuar se “askush nuk është mbi ligjin”.