Fridon Lala zgjidhet kryetar i ri i IRDK-së, Elbert Krasniqi tërhiqet nga drejtimi i partisë

Fridon Lala është zgjedhur kryetar i ri i Iniciativës së Re Demokratike të Kosovës (IRDK), pas votimit të delegatëve në Kuvendin e partisë.

Zgjedhja e Lalas u bë me shumicën e votave të delegatëve, të cilët i besuan atij drejtimin e partisë për mandatin e ardhshëm.

Në fjalën e tij pas zgjedhjes, Lala u zotua se do të punojë për forcimin dhe ngritjen e IRDK-së në nivele më të larta, duke theksuar se synimi i tij është zgjerimi dhe konsolidimi i partisë në të gjithë Kosovën.

Paraprakisht, IRDK-ja drejtohej nga ministri i Ministrisë së Administrimit të Pushtetit Lokal (MAPL), Elbert Krasniqi. Gjatë Kuvendit, Krasniqi njoftoi se po tërhiqet nga posti i kryetarit, por do të vazhdojë të mbetet anëtar i partisë.

Ai tha se vendimi për t’u larguar nga drejtimi i IRDK-së është marrë për t’u hapur rrugë gjeneratave të reja, duke shprehur besimin se udhëheqja e re do ta çojë partinë përpara dhe do të vazhdojë angazhimin për përfaqësimin e qytetarëve.