Fushata në kulm: Premtime për ekonomi, paga dhe drejtim të ri politik

Partitë politike kanë vazhduar aktivitetet elektorale të premten, duke prezantuar programet dhe premtimet e tyre para zgjedhjeve të 7 qershorit.

Kryetari i Lëvizjes Vetëvendosje, Albin Kurti, në tubimin e mbajtur në Prizren u bëri thirrje qytetarëve për mobilizim, duke shprehur pritjen për një rezultat historik për subjektin që drejton.

“Më 7 qershor bëhuni pjesë e një rekordi të ri historik të fitores së lëvizjes sonë e tuaj, të fitores së Vetëvendosjes me partnerët e saj”, ka deklaruar Kurti.

Ai ka theksuar investimet e realizuara gjatë mandatit qeverisës, duke thënë se qeverisja e tij nuk mund të krahasohet me ato paraprake.

Në Mitrovicë, kandidati i PDK-së për kryeministër, Bedri Hamza, ka prezantuar programin qeverisës të partisë, duke premtuar rritje të pagave dhe pensioneve, si dhe mbështetje për bizneset.

“Kur të rritet buxheti, PDK-ja do t’i rrisë pagat prej 50% për të gjithë shërbyesit civilë. Do t’i rrisim pensionet për të gjithë në vlerë prej 50%. Në qeverisjen e PDK-së, nuk do të ketë pension më të vogël se 300 euro”, ka thënë Hamza.

Ndërkohë, Lidhja Demokratike e Kosovës ka mbajtur tubim në Prishtinë, ku kryetari i partisë, Lumir Abdixhiku, ka deklaruar se LDK-ja është rikthyer fuqishëm në skenën politike.

“Sonte e shënojmë fillimin e një kapitulli të ri për Kosovën. Sonte shënojmë një moment definues të historisë së popullit tonë”, ka thënë Abdixhiku para mbështetësve.

Edhe Vjosa Osmani ka folur në tubim, duke theksuar se vendi ka nevojë për një kapitull të ri të bazuar në bashkim dhe dinjitet.

“Kosova meriton shumë më tepër sesa ajo që po e merr sot. Unë besimin e kam te ju, te forca, mençuria dhe vendosmëria e këtij populli”, është shprehur Osmani.

Aleanca për Ardhmërinë e Kosovës ka mbajtur tubimin qendror në Pejë. Kryetari i AAK-së, Ardian Gjini, ka kritikuar qeverisjen aktuale dhe ka kërkuar ndryshim të kursit politik të vendit.

“Kosova është në tren të gabuar dhe kur je në tren të gabuar, krejt stacionet do të jenë të gabuara pasi drejtimi është i gabuar”, ka deklaruar Gjini.

Ai ka shtuar se synimi i AAK-së është t’i ofrojë vendit një drejtim tjetër zhvillimor dhe politik.

Qytetarët do t’u drejtohen kutive të votimit më 7 qershor.