Komisioni Qeveritar për Persona të Zhdukur ka njoftuar se janë gjetur mbetje mortore në Brekoc të Gjakovës, shkruan GazetaDemos.
IML bashkë me Policinë e Kosovës kanë qenë prezent gjatë gërmimeve të kryera nga ky komision, e këto eshtra potencialisht i përkasin listës së personave të zhdukur.
“Komisioni dhe partnerët institucional janë të përkushtuar për trajtimin me prioritet dhe kujdes të posaçëm të kësaj çështjeje, në shërbim të familjeve të viktimave dhe për të vënë drejtësinë në vend”, thuhet në njoftim.
Postimi i plotë:
Njoftim për gjetje të eshtrave (mbetje mortore) – Gjakovë, Brekoc
Sot, në Brekoc të Gjakovës, gjatë gërmimeve të kryera nga Komisioni Qeveritar për Persona të Zhdukur, në bashkëpunim me Institutin e Mjekësisë Ligjore (IML) dhe Policinë e Kosovës, është konfirmuar gjetja e mbetjeve mortore që potencialisht i përkasin listës së personave të zhdukur.
Pas kthimit në këtë lokacion për gërmime të mëtejshme dhe vlerësuese, ekipet tona kanë hasur në eshtra.
Pas eksaminimit antropologjik dhe identifikimit përmes ADN‑së, ne do t’a informojmë familjet dhe opinionin për identifikimin.
Komisioni dhe partnerët institucional janë të përkushtuar për trajtimin me prioritet dhe kujdes të posaçëm të kësaj çështjeje, në shërbim të familjeve të viktimave dhe për të vënë drejtësinë në vend.
