Gjyqtari që dënoi aktivistët e VV-së del të jetë edhe nipi i të burgosurës politike, Sevdije Shyti-Azemi

Gazetari Lirim Mehmetaj bëri të ditur se gjyqtari që dënoi aktivistët e VV-së është edhe nipi i të burgosurës politike, Sevdije Shyti-Azemi

“Sevdija ka qenë e dënuar me dy vjet burg për organizimin e protestave me gratë e fshatit Zhabar në Mitrovicë më 27 mars 1989.”, shkroi Mehmetaj.

Shkrimi i plotë:

“Po më shan se i kam duart e lidhura se vallahi s’kishe ditë as me fol…”

Kjo në foto është Sevdije Shyti-Azemi, halla e gjyqtarit Kushtrim Shyti, që dënoi huliganët e Vetëvendosjes, Arlind Manxhuka e Egzon Azemi, me burgim për nxitje të përçarjes e mos-durimit.

Sevdija ka qenë e dënuar me dy vjet burg për organizimin e protestave me gratë e fshatit Zhabar në Mitrovicë më 27 mars 1989.

Në aktakuzë thuhej se ajo kishte tentuar ta shkatërronte “vëllazërim-bashkimin”.

Dhe kësaj akuze Sevdija i ishte përgjigjur: “Çfarë shteti ashtu kjo Jugosllavia që e shkatërron nji grue e pashkollë e katundare?”

Sevdija, kur kishte marrë vesh për demonstratat kundër suprimimit të autonomisë dhe për grevën e minatorëve kishte vendosur të bëhej pjesë e organizimit.

Kur e kishin arrestuar në burg e kishin torturuar rëndë.

Ja çfarë thoshte Sevdija më pas: “Nuk më kanë dhimtë grushtat që m’i dhanë e më përgjakën, sa më dhimti zemra për shaminë e nanës që ma morën e s’ma kthyen kurrë”.

Njërit hetues Sevdija i kishte thanë: “po më shan se i kam duart e lidhura se vallahi s’kishe ditë as me fol”.

Kur e kishin burgosur Sevdijen ajo kishte lënë në shtëpi plot shtatë fëmijë.

Nipi i saj është Kushtrim Shyti që i dënoi sot halabakët e Vetëvendosjes.

Kurse baba i Kushtrimit, vëllai i Sevdijes, është ish-mësues e dëshmor i kombit në luftën e fundit.

Kësaj familje, që ka kontribut patriotik më shumë se krejt Vetëvendosja bashkë, t’bijët e UDBASH-ave sot i thanë po punon për interesa të Serbisë, veç pse Kushtrimi ua dha dënimin meritor huliganëve të Vetëvendosjes, Arlind Manxhuka e Egzon Azemi.

Në foto: Gjyqatari Kushtrim Shyti, babai i tij, dëshmori i kombit Mustafë Shyti dhe halla e Kushtrimit, heroina ish e burgosura politike, Sevidje Shyti.