Komentatori politik Halil Matoshi ka komentuar diskutimet rreth emrave të mundshëm për postin e Presidentit të Republikës së Kosovës, duke theksuar se megjithëse ka disa opsione serioze, vendimi përfundimtar varet nga vullneti politik i partive.
Sipas Matoshit, Blerim Shala përmendet si një nga kandidatët kryesorë, ndërsa Veton Surroi gjithashtu mund të jetë një emër i mundshëm. Megjithatë, ai thekson se secili prej tyre përballet me vështirësi në raport me partitë politike.
“Fatkeqësisht, në Kosovë presidenti zgjidhet nga partitë politike, jo drejtpërdrejt nga qytetarët, dhe kjo i vë kandidatët në varësi të interesave partiake,” ka deklaruar Matoshi në Politiko.Ai shton se ndër emrat e përfolur është edhe Bekim Sejdiu, ish-gjyqtar i Gjykatës Kushtetuese, të cilin e konsideron një opsion serioz nga aspekti profesional dhe institucional.
“Opsione ka mjaft, por pyetja kryesore është nëse ekziston vullnet politik. Ky vullnet, në fund të fundit, varet nga shefi dhe nga shumica parlamentare,” ka përfunduar Matoshi./Gazeta 10
