Haradinaj i reagon sërish Arjan Konomit: Gabimi ose është gabim, ose nuk është gabim

Nasim Haradinaj ka reaguar sërish ndaj deklaratës së Arjan Konomit ku është shprehur se krahasimin e ka bërë për protestën dhe jo për luftën në Kosovë, duke kërkuar ndjesë ndaj të gjithë atyre që janë prekur.

Haradinaj ka thënë se pranimi i gabimit duhet të jetë i plotë dhe i sinqertë, pa u përpjekur të minimizohet përgjegjësia.

“Gabimi ose është gabim, ose nuk është gabim!”, ka shkruar Haradinaj në reagimin e tij.

Ai ka vlerësuar se kur dikush dëshiron sinqerisht ta pranojë një gabim, nuk mund ta bëjë këtë vetëm pjesërisht, duke e zbutur apo minimizuar përgjegjësinë për atë që ka thënë.

“Kur njeriu dëshiron sinqerisht ta pranojë gabimin, nuk mund ta pranojë atë vetëm pjesërisht, duke e zbutur apo minimizuar përgjegjësinë për të.

Sepse edhe krahasimi i dhunës serbe kundër protestave të viteve ’98 me rrethana të tjera, pa e sqaruar drejt kontekstin dhe dallimet thelbësore, është po aq problematik sa vetë përpjekja për ta relativizuar gabimin.

Pranimi i gabimit kërkon sinqeritet, përgjegjësi dhe guxim për ta thënë të vërtetën ashtu siç është, e jo ashtu siç na konvenon”, tha ai.