Kryetari i AAK-së, Ramush Haradinaj, ka uruar SHBA-në në 250-vjetorin e krijimit të ushtrisë amerikane.
Ai tha se trimëria e kësaj ushtrie është frymëzim për ushtrinë e Kosovës, ndërsa shprehu falënderime për mbështetjen në “momentet më vendimtare të historisë sonë”.
“Në këtë ditë historike, shpreh urimet më të përzemërta për popullin amerikan dhe pjesëtarët e institucioneve mbrojtëse të ShBA-së, për 250-vjetorin e krijimit të Ushtrisë Amerikane. Sakrifica, trimëria dhe përkushtimi i ushtrisë amerikane mbeten frymëzim i vazhdueshëm për ne dhe Ushtrinë e Kosovës. Përjetë falënderues për mbështetjen në momentet më vendimtare të historisë sonë”, ka shkruar Haradinaj.
Ushtria amerikane (United States Army) u krijua më 14 qershor 1775, gjatë Luftës për Pavarësinë e SHBA-ve. Komandanti i saj i parë ishte George Washington, i cili më vonë u bë presidenti i parë i Shteteve të Bashkuara.
