Hoti për shkarkimin e Isufajt: Qeveria Kurti nuk po kërkon drejtësi të pavarur, por drejtësi që i përshtatet pushtetit

Avdullah Hoti nga LDK ka reaguar pas shkarkimit të Kryeprokurorit të Prokurorisë Speciale, Blerim Isufaj.

Hoti përmendi hetimet për skandalet që, sipas tij, lidhen me ministra të Qeverisë Kurti, duke vënë në pikëpyetje arsyetimin për shkarkimin e Isufajt me “performancë të dobët”.

“Një njeri i luftës për lirinë e Kosovës, një zyrtar i shtetit me integritet të lartë profesional sot largohet nga detyra pikërisht kur Prokuroria po merret me dosje tejet të ndjeshme”, ka shkruar Hoti.

Ai e ka akuzuar Qeverinë Kurti se nuk po kërkon drejtësi të pavarur, por drejtësi që i përshtatet pushtetit.

“Kur prokurori bëhet problem vetëm pse nuk është i kontrollueshëm, problemi nuk është prokurori. Problemi është pushteti që kërkon kontroll mbi drejtësinë.

Kosova nuk u krijua si një shtet ku Qeveria vendos se kë duhet ta hetojë drejtësia. Pushtetet ndryshojnë, veprimet e turpshme si ky i sotmi mbeten. Ligji vonon, por e gjen secilin”, shtoi ai.