Ilir Peci thotë se ndërrimi pushtetit në Zveçan nuk është bërë zyrtarisht

Ish-kryetari i komunës së Zveçanit, Ilir Peci, ka deklaruar se procesi i pranim-dorëzimit të detyrës nuk është realizuar ende, pavarësisht pretendimeve të kryetarit të ri, Dragisha Milovic, se gjithçka është kryer me sukses dhe në mënyrë korrekte.

Në një prononcim për Tëvë1, Peci ka mohuar kategorikisht se ka pasur takim apo nënshkrim të dokumenteve zyrtare.

“Për momentin nuk më kanë njoftuar në takim për ta bërë pranim-dorëzimin, kështu që unë jam duke pritur. Jam i gatshëm në çdo moment me shku në takim dhe me bë pranim-dorëzimin në mënyrën zyrtare. Zyrtarisht nuk ka nënshkrime. Sot as nuk jemi takuar me kryetarin dhe nuk kemi pasur zyrtarisht nënshkrim të pranim-dorëzimit. Nënshkrimet i kam të përgatitura, do të thotë se zyrtarisht nuk ka asgjë”, tha ai.

Ndryshe, të premten në komunat veriore të Kosovës Mitrovicë e Veriut, Zveçan, Leposaviq, Graçanicë dhe Zubin Potok u mbajtën seancat inauguruese dhe u betuan kryetarët e rinj dhe asamblistët, duke shënuar nisjen e mandateve të reja pas zgjedhjeve lokale.

Sa i përket Zveçanit, pranim-dorëzimi i detyrës për kryetarin e ri, Dragisha Milloviq nga Lista Serbe, ishte paraparë të mbahej këtë të hënë, pasi të premten, Milloviq kishte refuzuar të shkonte në zyrën e Ilir Pecit për ta pranuar zyrtarisht detyrën, duke shtyrë procesin formal të ndërrimit të pushtetit.