Instagrami, Facebook-u dhe Messengeri jashtë funksionit për mijëra përdorues, aplikacionet të paqasshme edhe në Kosovë

Mijëra përdorues duket se janë prekur nga një ndërprerje e gjerë e shërbimeve që ka goditur Instagramin, Facebook-un dhe Messenger-in të premten, ndërsa raportimet kanë vërshuar në rrjetet sociale dhe në faqen për monitorimin e ndërprerjeve, Downdetector.

Sipas Downdetector, numri i raportimeve për probleme në Instagram u rrit ndjeshëm, nga rreth 25 ankesa në disa mijëra, pasi përdoruesit raportuan se ishin nxjerrë jashtë llogarive të tyre, nuk mund të hapnin aplikacionin ose nuk kishin qasje në profilet e tyre, raporton nypost .

Përdoruesit e frustrur shpejt iu drejtuan seksionit të komenteve në Downdetector për të shprehur pakënaqësitë e tyre. Njëri prej tyre shkroi se përballej vetëm me një “faqe të zbrazët”, ndërsa një tjetër tha se ishte “çkyçur nga llogaria pa asnjë arsye” dhe nuk mund të identifikohej sërish.

Problemi nuk dukej të ishte i kufizuar vetëm te Instagrami. Në platformën X, përdorues të shumtë raportuan se ishin nxjerrë jashtë Facebook-ut dhe Messenger-it, ndërsa gjatë përpjekjeve për t’u kyçur sërish përballeshin me mesazhe gabimi.

“A është çkyçur dikush tjetër nga Facebook Messenger dhe nuk mund të hyjë më? Gabim i panjohur”, shkroi një përdorues, ankesë që u përsërit nga shumë të tjerë.

Një tjetër përdorues shkroi: “Facebook jashtë funksionit??? Më ka nxjerrë nga llogaria dhe më shfaq gabim në kërkesë.”

Disa përdorues thanë se ishin çkyçur njëkohësisht nga Facebook-u dhe Messenger-i, ndërsa të tjerë ngritën pyetjen nëse problemi ishte global. Një postim pretendonte se “Facebook-u ka rënë në nivel global”.