Komunat paralajmërojnë protestë, Murati: Vitin tjetër do t’u ndahen 907 milionë euro

Ministri në detyrë i Financave, Hekuran Murati, ka reaguar pas paralajmërimeve të kryetarëve të komunave për protestë para Qeverisë në muajin shtator, duke theksuar rritjen e buxhetit të komunave për vitin e ardhshëm.

Murati ka bërë të ditur se Ministria e Financave ka lëshuar javën e kaluar Qarkoren e Dytë Buxhetore për komunat, përmes së cilës përcaktohen kufijtë buxhetorë për secilën komunë.

Sipas tij, buxheti i ndarë për komunat ka shënuar rritje të vazhdueshme gjatë viteve të fundit, si rezultat i rritjes së të hyrave buxhetore.

“Falë performancës së jashtëzakonshme të të hyrave buxhetore përgjatë viteve të fundit, është krijuar hapësira fiskale për rritje të vazhdueshme të buxhetit që u ndahet komunave”, ka shkruar Murati.

Ai ka krahasuar buxhetin aktual me atë të vitit 2021, duke theksuar se mjetet e parapara për pushtetin lokal janë rritur ndjeshëm.

“Buxheti për komunat vitin e ardhshëm tejkalon 900 milionë euro. Nga 546 milionë euro sa e kishim gjetur në vitin 2021, buxheti i ndarë për komunat do të shkojë në 907 milionë euro në vitin 2027”, ka deklaruar Murati.

Reagimi i tij vjen pasi kryetari i Prishtinës, Përparim Rama, së bashku me disa kryetarë të tjerë të komunave, ka paralajmëruar protestë para Qeverisë në muajin shtator.

Rama ka akuzuar Qeverinë për bllokim të mjeteve dhe pengim të projekteve komunale, duke pretenduar se komunat që nuk udhëhiqen nga Vetëvendosje po përballen me presion financiar dhe politik.

Sipas Ramës, mbi 344 milionë euro u janë marrë komunave që nga viti 2022 për obligime që, siç ka thënë ai, nuk janë krijuar nga komunat.

“Kjo qasje primitive, përveçse është diskriminuese…”, ka deklaruar Rama, duke paralajmëruar se kryetarët e komunave do të dalin në protestë në shtator.

Në anën tjetër, Murati ka vënë në pah shifrën prej 907 milionë eurosh si buxhetin e planifikuar për komunat në vitin 2027.