Policia e Kosovës ka njoftuar se një person është gjetur i vdekur dje pasdite në varrezat e fshatit Përpellac të Podujevës, teksa shtuan se afër trupit të tij është gjetur një armë, e cila më pas u sekuestrua.
Viktima e rastit është ushtari i UÇK-së, Hamdi Zejnullahu.
Lajmin e ka bërë të ditur, Hysen Mustafa përmes një postimi ka fajësuar institucionet për neglizhencë të rehabilitimit të luftëtarëve.
“Na e le pa frymë, o Hamdi burri! Moskujdesi institucional për rehabilitimin e luftëtarëve të lirisë po bën që shumë prej tyre ta privojnë vetën nga jeta dhe të ikin në amshim. Të dashur bashkëluftëtarë, sot na u nda nga kjo botë edhe një vëlla i armës. Për kohën e varrimit do t’ju njoftojmë. Nderime bashkëluftëtari im. Të qoftë i lehtë dheu i lirisë, Hamdi Zejnullahu”, shkroi ai.
Në raportin 24-orësh, policia tha se po e heton vdekjen e tij.
“Fsh. Përpellac, Podujevë 26.09.2025 – 21:10. Raportohet se në varrezat e fshatit është gjetur viktima mashkull kosovar, pa shenja jete. Afër trupit të tij është gjetur një pistoletë. Pistoleta me 6 fishekë dhe një gëzhojë është sekuestruar. Me vendim të prokurorit trupi i pa jetë i viktimës është dërguar në IML për obduksion”.
