“Jam ndërtues, kam shumë borxhe”, zbardhet dëshmia e 58-vjeçarit që grabiti bankën në Tiranë

Një bankë e nivelit të dytë ra pre e grabitjes me armë të enjten në Tiranë. Policia arriti të neutralizojë autorin, Bardhyl Fusha, 58 vjeç sapo doli nga banka me çantën me para dhe një automatik tip kallashnikov me të cilin kreu grabitjen.

Në dëshminë e tij para policisë Fusha ka thënë se kishte shumë borxhe ndaj kishte tentuar të grabiste bankën.

“Jam ndërtues, kisha shumë detyrime për palë të treta, ndaj u futa për të grabitur Bankën”, mësohet të jetë shprehur Fusha.

Sipas informacioneve, Fusha u fut në ambientet e bankës me një armë automatike kallashnikov

Brenda çantës ku mbante armën, ai futi edhe disa para që arriti të merrte nga arka e bankës. Pas sinjalizimit, në vendngjarje mbërritën forcat e policisë dhe ishin dy efektivë të patrullës “Shqiponja” që e neutralizuan para se të largohej./Euronews.al