Komandanti i FSK-së, gjenerallejtënant Bashim Jashari ka pritur në takim të ngarkuarin me punë në Ambasadën e Japonisë në Kosovë, Hiroyasu Tanigaki dhe atasheun kolonel Tomofumi Iwasaki.
Gjatë këtij takimi, Jashari i ka njoftuar zyrtarët japonezë për situatën e sigurisë dhe për zhvillimin e FSK-së.
Po ashtu u diskutua për bashkëpunimin e shkëlqyer mes Forcës së Sigurisë së Kosovës dhe Japonisë.
“Gjeneral Jashari vlerësoi lart marrëdhëniet me partnerët strategjikë dhe falënderoi shtetin japonez për mbështetjen e vazhdueshme në ngritjen e kapaciteteve të FSK-së, veçanërisht përmes programeve të trajnimit dhe shkollimit”, thuhet në njoftim.
Në përmbyllje, të dyja palët shprehën gatishmërinë për thellimin e mëtutjeshëm të bashkëpunimit dypalësh, duke konfirmuar përkushtimin për forcimin e partneritetit dhe sigurisë.
