Ligji për Gjykatën Speciale ndryshimi i të cilit është miratuar mbrëmë në lexim të dytë në seancën plenare të Kuvendit, synon kufizimin e juridiksionit të kësaj gjykate në vepra të kryera vetëm pas luftës – nga 1 korriku 1999 deri më 31 dhjetor 2000. Ndërsa ai i deridjeshëm u jepte Dhomave të Specializuara juridiksion për krimet e pretenduara të kryera nga janari i vitit 1998 deri në dhjetor të vitit 2000.
Ligji nuk e shfuqizon Gjykatën Speciale, por synon t’ia kufizojnë mandatin lëndor, por edhe kohor e territorial kësaj gjykate, si dhe përcaktimin se cilat vepra penale do të mund të gjykoheshin në Speciale.
Neni 2 e kufizon juridiksionin në vepra specifike, të lidhura me nxjerrjen, heqjen dhe trafikimin e paligjshëm i organeve, indeve ose qelizave njerëzore, siç identifikohet dhe pretendohet specifikisht në Raportin e Asamblesë Parlamentare të Këshillit të Evropës. Po ashtu, edhe veprat si vrasja e paligjshme, tortura ose trajtimi mizor dhe çnjerëzor i kryer në vendet specifike të ndalimit të emërtuara shprehimisht në Raport, dhe kur akte të tilla janë kryer drejtpërdrejt ose në lidhje të menjëhershme me veprimet e marrjes së organeve.
“Dhomat e Specializuara dhe Zyra e Prokurorit të Specializuar nuk kanë juridiksion lëndor (ratione materiae) mbi krimet e përgjithshme të luftës, krimet kundër njerëzimit ose dhunën politike të kryer në Kosovë që nuk përbëjnë element të drejtpërdrejtë dhe përbërës të akteve specifike të numëruara në paragrafin 1 të këtij neni”, thuhet në nenin 2 të ligjit.
Ndërkaq, neni 6 parasheh që procedurat aktive që nuk bien në juridiksionin e ri të Speciales, e po ashtu edhe aktakuzat e konfirmuara dhe gjykimet, të transferohen në Departamentin Special të Gjykatës Themelore në Prishtinë, ndërsa kallëzimet penale, hetimet dhe dosjet e ndjekjes, t’i kalojnë Prokurorisë Speciale të Kosovës.
Për personat e paraburgosur, ligji i hartuar nga PDK-ja parasheh transferimin në Kosovë.
