Kryeministri në detyrë i Kosovës, Albin Kurti, ka treguar se ka zhvilluar një takim me Institutin Jacques Delors, një institut me qendër në Paris, siç thotë Kurti i themeluar nga një prej arkitektëve më të mëdhenj të Bashkimit Evropian.
“Në takim u diskutua për gjeopolitikën dhe ndikimin e saj në Ballkanin Perëndimor,” ka shkruar ndër tjerash Kurti në “X”, të mërkurën.
Ai ka theksuar se ka shfrytëzuar rastin për të theksuar nevojën për një qasje vendimtare dhe të bazuar në meritë në procesin e zgjerimit të BE-së, si çelës për sigurinë evropiane përballë rreziqeve aktuale gjeopolitike.
Sipas Kurtit, në takim është diskutuar edhe për investimet e Kosovës në mbrojtje, për mbrojtjen kushtetuese dhe praktike të të drejtave të njeriut dhe të pakicave, si dhe për lidhjen e pandashme midis agjendave ekonomike dhe parimeve demokratike.
“Ishte kënaqësi të takohesha me Institutin Jacques Delors, një organizatë e nderuar me seli në Paris, e themeluar nga emri i saj, një nga arkitektët më të mëdhenj të BE-së, për një diskutim mbi gjeopolitikën dhe ndikimin e saj në Ballkanin Perëndimor. Shfrytëzova rastin për të theksuar nevojën për një qasje vendimtare dhe të bazuar në meritë ndaj zgjerimit nga BE-ja, si një çelës për sigurinë evropiane përballë rreziqeve aktuale gjeopolitike. Diskutuam gjithashtu investimet në mbrojtje të Kosovës, mbrojtjen kushtetuese dhe praktike të të drejtave të njeriut dhe të pakicave, si dhe lidhjen e pandashme midis axhendave ekonomike dhe parimeve demokratike”, ka shkruar Kurti.
