Komuna e Lipjanit ka nderuar vlerat e luftës, duke vendosur sot gurthemelin për Muzeun e Veteranëve të UÇK-së në Krojmir.
Lajmin e ka bërë të ditur kryetari i kësaj komune, Imri Ahmeti, i cili tha se ky objekt i dedikohet vlerave dhe sakrificës së Ushtrisë Çlirimtare të Kosovës dhe do të shërbejë si muze për veteranët dhe invalidët e luftës.
“Sot me plot krenari e mirënjohje, po vendosim gurthemelin e Muzeut të Veteranëve të UÇK-së në Krojmir.
Ky objekt i dedikohet vlerave dhe sakrificës së Ushtrisë Çlirimtare të Kosovës dhe do të shërbejë si muze për veteranët dhe invalidët e luftës, një hapësirë për ruajtjen dhe përkujdesjen ndaj kujtesës sonë historike.
Kemi detyrim moral dhe institucional që lufta për çlirimin e vendit dhe përpjekjet e bijve e bijave më të mira të këtij vendi të memorohen dhe të dokumentohen, jo vetëm me fjalë, por edhe me vepra konkrete.
Përmes këtij muzeu, do t’u përcjellim gjeneratave të reja të vërtetën historike të Ushtrisë Çlirimtare të Kosovës, duke e mbajtur gjallë kujtimin dhe krenarinë tonë kombëtare”, tha Ahmeti.
