Dhëndri i Sali Berishës, Jamarbër Malltezi ka fituar lirinë. Gjykata e Posaçme ka marrë vendimin për t’i hequr masën e sigurisë “arrest shtëpie”.
Jamarbër Malltezi, i cili është marrë i pandehur për dosjen “Partizani”, është liruar kundrejt garancisë pasurore.
“U hoq masa e arrestit me garanci pasurore, ka mbi 20 muaj që kjo ishte një farsë politike, një urdhër politik. Nuk kemi të bëjmë me shtet ligjor, por që sulmon armiqtë e PS-së”, deklaroi pas daljes nga GJKKO.
Dhëndri i ish-kryeministrit u arrestua në 22 Tetor 2023 me kërkesë të SPAK, por Apeli i GJKKO me një vendim të datës 21 Nëntor 2023 caktoi masën “arrest shtëpie” ndaj tij.
Ndërkohë magjistratja Elsa Ulliri, është gjyqtarja që do të shqyrtojë çështjen e Sali Berishës dhe Jamarbër Malltezit.
Kjo e fundit kërkoi dorëheqjen nga çështja për konflikt interesi pasi është e afërme e ish-deputetes demokrate, Andia Ulliri, por u rrëzua.
Të pandehur për dosjen “Partizani” janë ish-kryeministri Sali Berisha, Jamarbër Malltezi si dhe tre persona të tjerë.
Ndaj kreut të PD-së është ngritur akuza për kryerjen e veprës penale “ Korrupsioni pasiv i funksionarëve të lartë shtetërorë ose i të zgjedhurve vendorë ”, kryer në bashkëpunim.
Ndërsa Jamarbër Malltezi akuzohet për “ Korrupsioni pasiv i funksionarëve të lartë shtetërorë ose i të zgjedhurve vendorë ”, si dhe “ Pastrimi i produkteve të veprës penale ose veprimtarisë kriminale ” kryer në bashkëpunim.
Tre të pandehurit e tjerë, biznesmeni Fatmir Bektashi akuzohet për “korrupsion aktiv” dhe “pastrim parash”, Xhimi Begeja, trashëgimtar i tokës dhe bashkëpronar i ‘Homeplan’ dhe Andia Pustina, financiere që kryente të gjitha operacionet financiare dhe ligjore të Homeplan janë në akuzë për pastrim parash.
