Nënshkruhet kontrata për renovimin e palestrës “Karagaqi”

Ministria e Sportit dhe Rinisë ka nënshkruar kontratë për punët ndërtimore për renovimin e pjesshëm të Palestrës “Karagaqi” në Pejë.

Kontrata u nënshkrua për kryerjen e punimeve me vlerë prej 275,251 e 60 centë, raporton IndeksOnline.

Sipas njoftimit për nënshkrimin e kontratës, projekti përfshin zbatimin e dokumentacionit teknik dhe projektit të detajuar të arkitekturës dhe inxhinierisë për renovimin e palestrës.

Punimet duhet të realizohen në përputhje me kërkesat teknike, legjislacionin dhe standardet në fuqi, si dhe me pajisjet e aprovuara nga FIBA.

Kontrata financohet nga buxheti i konsoliduar i Kosovës, ndërsa kohëzgjatja e paraparë për realizimin e punimeve është pesë muaj. Procedura është zhvilluar përmes tenderimit të hapur, me kriter të dhënies së kontratës çmimin më të ulët.

Në këtë aktivitet prokurimi, dokumentet e tenderit janë kërkuar nga 55 operatorë ekonomikë.

Kontrata është nënshkruar më 21 korrik me grupin e operatorëve ekonomikë NBT-ING SH.P.K. dhe EURO CONSTRUCTION NNP SH.P.K.

Për këtë aktivitet është pranuar vetëm një tender, i cili është vlerësuar si i përgjegjshëm.

Renovimi pritet të tërheqë më shumë adhurues të basketbollit dhe jo vetëm, në të vetmën palestër sportive me përmasa të tilla në Pejë.