Nesër, në ora 13:15, në Gjykatën Themelore të Prizrenit pritet të zhvillohet seanca e radhës gjyqësore në lidhje me vrasjen e Auron Thaqit, 26-vjeçarit që humbi jetën një vit më parë si pasojë e një sulmi me thikë.
Ngjarja kishte ndodhur në Prizren në shtator të vitit 2024, kur Thaqi ishte plagosur rëndë dhe më pas ishte dërguar në Qendrën Klinike Universitare të Kosovës (QKUK), ku fatkeqësisht kishte ndërruar jetë si pasojë e plagëve të marra.
Sipas dyshimeve të para, pas plagosjes, ai ishte hedhur nga një veturë në lëvizje.
Për këtë rast janë arrestuar dhe ndodhen në paraburgim dy persona: Enes Ay dhe Hajrullah Brcani. Ay po hetohet për veprën penale “Lëndim i rëndë trupor” që ka rezultuar me vdekjen e viktimës, ndërsa Brcani akuzohet për “Mosdhënie ndihme” dhe “Moslajmërim të veprës penale apo kryerësve të saj”.
Rasti kishte shkaktuar reagime të shumta në opinionin publik, për shkak të rrethanave të rënda dhe lidhjeve të mundshme mes viktimës dhe të dyshuarve. Një vit pas ngjarjes tragjike, familja e Auron Thaqit vazhdon të kërkojë drejtësi, ndërsa procesi gjyqësor do të vazhdojë nesër me dëgjimin e dëshmive të reja .
