Nga Londra në Prishtinë me ora luksoze të padeklaruara, kapet një udhëtar në aeroport – vlera mbi 45 mijë euro

Dogana e Kosovës ka njoftuar se më 31 korrik 2025, rreth orës 10:30, në Pikëkalimin Kufitar të Aeroportit Ndërkombëtar “Adem Jashari” është zbuluar një rast i mosdeklarimit të mallrave me vlerë të konsiderueshme .

Sipas njoftimit, një udhëtar që kishte ardhur nga Londra dhe kishte zgjedhur të kalojë në kanalin e gjelbër – i dedikuar për ata që nuk kanë mallra për të deklaruar – u selektua për kontroll mbi bazën e analizës së rrezikut dhe imazheve të skanerit.

Gjatë kontrollit, në bagazhin e tij u gjetën katër orë dore, me një vlerë totale mbi 45 mijë euro, të cilat nuk ishin deklaruar sipas detyrimit ligjor. Mallrat u konfiskuan dhe ndaj udhëtarit ka nisur procedura kundërvajtëse.

Dogana e Kosovës kujton të gjithë udhëtarët se çdo mall me vlerë që kalon kufirin duhet të deklarohet sipas ligjit, ndërsa mosdeklarimi përbën shkelje dhe mund të sjellë masa ndëshkuese, përfshirë konfiskimin dhe gjoba.