Presidentja e Kosovës, Vjosa Osmani ka kujtuar 28 vjetorin e sulmit të dytë ndaj familjes Jashari, duke thënë se është dita kur Prekazi nuk u përkul, por u ngrit si kambanë lirie për gjithë kombin.
Osmani u shpreh gjithashtu se ky sulm ishte vetëm paralajmërimi i epopesë, sepse siç shkroi, më 5 mars 1998, Serbia sulmoi sërish.
“Në këtë ditë kujtese e krenarie shënojmë 28-vjetorin e sulmit të dytë të regjimit gjenocidal serb mbi familjen Jashari. Dita kur Prekazi nuk u përkul, por u ngrit si kambanë lirie për gjithë kombin. Makineria vrastare serbe u përball me rezistencën heroike nga Familja Jashari, e cila nuk u dorëzua kurrë. Prekazi foli me pushkë, sepse liria nuk dhurohet, por fitohet”.
“Ky sulm ishte vetëm paralajmërimi i epopesë. Më 5 mars 1998, Serbia sulmoi sërish. Tri ditë luftë. 59 anëtarë të familjes Jashari ranë heroikisht, bashkë me komandantin legjendar të UÇK-së, Adem Jashari. Ata nuk ranë për të vdekur, por për t’u përjetësuar dhe për ta bërë Kosovën e lirë. Prekazi është altari i lirisë, djepi i UÇK-së, ndërkaq Familja Jashari, flamuri që valon përjetësisht”, shkroi Osmani
