Deputetja e Lëvizjes Vetëvendosje, Fitore Pacolli ka reaguar lidhur me mungesën sot në seancë gjyqësore në rastin me gazin lotsjellës që dyshohet se e kishin hedhur në seancë plenare.
Reagimi i saj vjen pasi gjyqtari paralajmëroi përsëritje të urdhër-arrestit ose paraburgimin e Pacollit, pasi e njëjta sipas gjykatës nuk po paraqitet në seancë, e cila po dështon të mbahet.
Në reagimin e saj Pacolli ka thënë se s’ka pranuar ftesë asnjëherë nga gjykata, si dhe ka kundërshtuar atë që u tha nga gjyqtari se policia ka shkuar te vendbanimi i saj për ta sjellur me deytrim dje.
“Lidhur me raportimet për mungesën time në seancën e fundit në Gjykatën Themelore të Prishtinës, dua t’ju informoj se sapo kam dërguar një shkresë zyrtare drejtuar gjykatës, përmes së cilës kam kërkuar sqarime dhe dokumentim mbi:
1. Dorëzimin (apo mungesën e tij) të ftesës zyrtare për seancën, 2. Procedurat e ndjekura nga ana e shërbimeve përkatëse për komunikim me mua, 3. Çdo hap të mëtejmë që gjykata planifikon të ndërmarrë në këtë rast.
Nuk kam pranuar asnjë ftesë zyrtare dhe mbetem e gatshme të bashkëpunoj me drejtësinë, por pres që institucionet të veprojnë me rregull, korrektësi dhe transparencë”, ka shkruar Pacolli.
